ग्रामीण रुग्णालयांतील अडचणींबाबत आ सुरेश धस यांनी जिल्हा शल्य चिकित्सकांची भेट.
समृद्ध नगर न्यूज नेटवर्क – ता.15
आष्टी विधानसभा मतदारसंघातील ग्रामीण रुग्णालयांमधील गंभीर आरोग्यविषयक अडचणींबाबत जिल्हा रुग्णालय बीड येथे जिल्हा शल्य चिकित्सक डॉ. सतीशकुमार सोळंके यांची भेट घेऊन सविस्तर चर्चा करण्यात आली, अशी माहिती आष्टी विधानसभा मतदारसंघाचे नेते सुरेश धस यांनी दिली.
ग्रामीण रुग्णालय आष्टी, ट्रॉमा केअर आष्टी, ग्रामीण रुग्णालय पाटोदा तसेच ग्रामीण रुग्णालय शिरूर कासार येथे वैद्यकीय अधिकारी, अधिपरिचारिका, औषध निर्माता व इतर आवश्यक पदे मोठ्या प्रमाणावर रिक्त असल्यामुळे ग्रामीण भागातील नागरिकांना दर्जेदार आरोग्यसेवा मिळत नाही. आवश्यक सुविधा असतानाही रुग्णांना खाजगी रुग्णालये व प्रयोगशाळांकडे पाठविले जात असल्याच्या तक्रारी असल्याचे धस यांनी सांगितले.
महिलांच्या आरोग्य सेवांबाबत गंभीर स्थिती असून वेळेत स्त्रीरोगतज्ज्ञ उपलब्ध नसल्यामुळे गर्भवती महिलांना खाजगी रुग्णालयात दाखल करावे लागत आहे. त्यामुळे सामान्य कुटुंबांना सिझर शस्त्रक्रियेसाठी ₹२५ ते ₹३० हजार रुपयांपर्यंत अतिरिक्त खर्च करावा लागत असल्याने ही बाब अत्यंत चिंताजनक असल्याचे त्यांनी नमूद केले.
स्टेटमेंट – सुरेश धस:
“ग्रामीण व सामान्य नागरिकांना शासकीय रुग्णालयांत योग्य, वेळेवर आणि दर्जेदार वैद्यकीय सेवा मिळणे हा त्यांचा हक्क आहे. ग्रामीण रुग्णालयांतील रिक्त पदे तातडीने भरून सेवा-सुविधा प्रभावीपणे कार्यान्वित कराव्यात, अन्यथा याबाबत जनतेच्या आरोग्यासाठी अधिक तीव्र भूमिका घ्यावी लागेल,” असा इशारा सुरेश धस यांनी दिला.
दरम्यान, मौजे मानुर जाटवड येथील सर्पदंश झालेल्या मधुकर दादाबा बडे यांची जिल्हा शल्य चिकित्सकांसमवेत भेट घेऊन त्यांच्या प्रकृतीची चौकशी करण्यात आली.
