जवळा परिसरातील ज्येष्ठ वैद्यकीय सेवक डॉ. गोविंद सिताराम रासने यांचे निधन
समृद्ध नगर न्यूज नेटवर्क –
जवळा, नान्नज, हाळगाव आणि परिसरातील गोरगरीब रुग्णांचे आधारवड ठरलेले ज्येष्ठ वैद्यकीय सेवक डॉ. गोविंद सिताराम रासने यांचे दीर्घ आजाराने निधन झाले. त्यांच्या निधनामुळे संपूर्ण परिसरात हळहळ व्यक्त होत असून सेवाभावी, प्रामाणिक आणि लोकाभिमुख डॉक्टर हरपल्याची भावना व्यक्त होत आहे.
सुमारे ७० वर्षांपूर्वी डॉ. रासने यांनी जवळा भागात वैद्यकीय सेवेला प्रारंभ केला. त्या काळात ग्रामीण भागात आरोग्य सुविधांचा अभाव असताना त्यांनी निस्वार्थ भावनेने वैद्यकीय व्यवसाय स्वीकारला. सलग चार दशकांहून अधिक काळ त्यांनी जवळा, नान्नज, हाळगाव आणि आसपासच्या गावांमध्ये आरोग्य सेवा दिली. त्या काळात या संपूर्ण परिसरात वैद्यकीय सेवा देणारे ते एकमेव डॉक्टर होते.
डॉ. रासने हे अत्यंत कर्तव्यनिष्ठ आणि सेवाभावी व्यक्तिमत्त्व म्हणून ओळखले जात. गोरगरीब, गरजू रुग्णांसाठी ते देवदूत ठरले. अनेकदा रुग्णांकडून फी न घेता उपचार करणे, गरज पडल्यास रुग्णांच्या घरी जाऊन तपासणी करणे, रात्री-अपरात्री मदतीला धावून जाणे हे त्यांच्या सेवाभावाचे उदाहरण होते. त्यामुळेच त्यांनी हजारो कुटुंबांचा विश्वास जिंकला होता.
वैद्यकीय सेवेसोबतच त्यांनी सामाजिक व राजकीय क्षेत्रातही योगदान दिले. सन १९९७ मध्ये पंचायत समिती जवळा गणातून काँग्रेस पक्षाकडून निवडणूक लढवून ते विजयी झाले. त्या निवडणुकीत त्यांनी भाजपाचे प्रा. राम शिंदे यांचा पराभव केला होता. त्यांच्या कार्यपद्धतीमुळे त्यांना लोकांचा मोठा पाठिंबा लाभला.
डॉ. रासने यांच्या निधनाने परिसरातील एक सेवायुग संपल्याची भावना व्यक्त होत आहे. त्यांच्या कार्याची आठवण गावोगावी कृतज्ञतेने केली जात आहे.
त्यांच्या स्मृतीस विनम्र अभिवादन.
