नगरपरिषद, नगरपंचायतीच्या थेट निवडून आलेल्या अध्यक्षास सदस्यत्व व मतदानाचा अधिकार
अधिनियमात सुधारणा; अध्यादेश काढण्याचा मंत्रिमंडळाचा निर्णय
प्रांजली चिंतामणी यांना होणार थेट फायदा
समृद्ध नगर न्यूज नेटवर्क – दि २५
नगरपरिषद व नगरपंचायतींमध्ये थेट निवडून आलेल्या अध्यक्षास सदस्यत्व तसेच मतदानाचा अधिकार देण्यासाठी महाराष्ट्र नगरपरिषदा, नगरपंचायती व औद्योगिक नगरी अधिनियम, १९६५ मध्ये सुधारणा करण्याचा महत्त्वपूर्ण निर्णय राज्य मंत्रिमंडळाने घेतला आहे. यासाठी अध्यादेश काढण्यास आज झालेल्या मंत्रिमंडळ बैठकीत मान्यता देण्यात आली. या बैठकीच्या अध्यक्षस्थानी मुख्यमंत्री देवेंद्र फडणवीस होते.
या निर्णयाचा थेट फायदा जामखेड नगरपरिषदेच्या नवनिर्वाचित नगराध्यक्षा प्रांजली चिंतामणी यांना होणार असल्याचे स्पष्ट झाले आहे. जामखेड नगरपरिषदेमध्ये प्रांजली चिंतामणी या थेट निवडून आलेल्या नगराध्यक्षा असून, त्या प्रभाग क्रमांक ४ (ब) मधून नगरसेवक म्हणूनही निवडून आल्या आहेत. त्यामुळे मंत्रिमंडळाच्या या निर्णयानंतर येणाऱ्या अध्यादेशात दोन्ही पदे कायम ठेवण्याची तरतूद असल्यास, त्यांच्याकडे नगराध्यक्षा व नगरसेवक या दोन्ही पदांचा कार्यभार कायम राहण्याची शक्यता आहे.
नगराध्यक्ष पदाच्या थेट निवडणुकीत प्रांजली चिंतामणी यांनी तब्बल ३,६८२ मतांनी विजय मिळवला आहे. याशिवाय त्या प्रभाग ४ (ब) मधून नगरसेवक म्हणूनही निवडून आल्याने, या अध्यादेशाचा सरळ आणि प्रत्यक्ष लाभ त्यांना होणार असल्याचे राजकीय वर्तुळात बोलले जात आहे.
सध्याच्या कायद्यानुसार, नगरपरिषद व नगरपंचायतींमध्ये अध्यक्ष म्हणून निवडून येण्यास पात्र असलेली व्यक्ती सदस्य म्हणूनही निवडून येऊ शकते. त्यामुळे एकाच व्यक्तीला अध्यक्ष व सदस्य या दोन्ही पदांसाठी जनतेचा स्पष्ट जनादेश मिळत असतो. मात्र सदस्यांमधून निवडून आलेला अध्यक्ष सदस्य म्हणून कायम राहत असताना, थेट निवडून आलेल्या अध्यक्षास सदस्यत्व व मतदानाचा अधिकार नसल्याने प्रशासकीय व निर्णयप्रक्रियेत विसंगती निर्माण होत होती.
या पार्श्वभूमीवर करण्यात येणाऱ्या सुधारणेनुसार, थेट निवडून आलेला अध्यक्ष एकाच वेळी अध्यक्ष व सदस्य अशी दोन्ही पदे धारण करू शकणार आहे. तसेच अध्यक्षास सदस्य म्हणून एक मत देण्याचा अधिकार मिळणार असून, मतदानात मतांची बरोबरी झाल्यास अध्यक्षाचा निर्णायक मताचा अधिकार पूर्वीप्रमाणे कायम राहणार आहे.
या सुधारणांमुळे स्थानिक स्वराज्य संस्थांमधील लोकशाही प्रक्रिया अधिक बळकट होईल, तसेच थेट निवडून आलेल्या अध्यक्षाच्या भूमिकेला कायदेशीर स्पष्टता मिळेल, असा सरकारचा विश्वास आहे.
चौकट
सभापती प्रा. राम शिंदे यांची सोशल मीडिया पोस्ट
जामखेड नगरपरिषदेमध्ये प्रांजली चिंतामणी या थेट निवडून आलेल्या नगराध्यक्षा असून त्या प्रभाग ४ (ब) मधून नगरसेवक म्हणूनही निवडून आल्या आहेत. त्यामुळे मंत्रिमंडळाने घेतलेल्या या निर्णयाचा फायदा त्यांना होणार असल्याचे स्पष्ट आहे. या निर्णयाबाबत विधानपरिषदेचे सभापती प्रा. राम शिंदे यांनीही सोशल मीडियावर पोस्ट करत समाधान व्यक्त केले आहे.
