शिवरायांवरील वक्तव्याचा मुद्दा पुन्हा पेटला; छिंदमला सभागृहाबाहेर हाकलले
समृद्ध नगर न्यूज नेटवर्क : अहिल्यानगर
काही वर्षांपूर्वी छत्रपती शिवाजी महाराज यांच्याबद्दल आक्षेपार्ह वक्तव्य केलेल्या नगरसेवक श्रीपाद छिंदम याच्याविरुद्ध अहिल्यानगरकरांचा संताप आज पुन्हा एकदा उफाळून आला. आज अहिल्यानगर महापालिकेची सर्वसाधारण सभा सुरू असताना छिंदम याला सभागृहाबाहेर काढण्याची जोरदार मागणी नगरसेवकांनी केली.
सत्ताधारी आणि विरोधी अशा दोन्ही गटांतील नगरसेवक या मुद्द्यावर आक्रमक झाले होते. काही नगरसेवकांनी थेट छिंदम याच्या आसनाजवळ जाऊन त्याचा घेराव घातला. घोषणाबाजी करत त्याला सभागृहाबाहेर जाण्यास सांगण्यात आले.
महापौर ज्योती गाडे आणि आयुक्त यशवंत डांगे यांच्याकडेही नगरसेवकांनी छिंदम याला तात्काळ बाहेर काढण्याची मागणी केली. “शिवद्रोही व्यक्तीसोबत आम्ही सभागृहात बसणार नाही. त्याच्याविरोधात ठराव करावा, अन्यथा आम्ही सभात्याग करू,” अशी ठाम भूमिका नगरसेवकांनी घेतली.
राष्ट्रवादी काँग्रेसचे नगरसेवक संपत बारस्कर यांच्यासह सर्वच नगरसेवकांनी या मागणीसाठी पुढाकार घेतला. काही नगरसेवकांनी छिंदम याच्या समोरील माईक काढून घेत त्याला थेट सभागृहाच्या दरवाजापर्यंत नेले आणि बाहेर काढले. त्यानंतरच सभागृहाचे कामकाज सुरू झाले.
छिंदम याने यापूर्वी शिवरायांचा अवमान केल्याप्रकरणी त्यावेळी तो उपमहापौर असताना त्याच्यावर गुन्हा दाखल झाला होता. त्यानंतर त्याची पक्षातून हकालपट्टी करण्यात आली आणि नगरसेवकपदही रद्द करण्यात आले होते. मात्र, त्यानंतरही तो दोन वेळा निवडून आला असून सध्या तो बहुजन समाज पक्षाकडून नगरसेवक आहे.
दरम्यान, आजच्या घटनेदरम्यान छिंदम हा लोकशाहीचा दाखला देत आपली बाजू मांडण्याचा प्रयत्न करत होता; मात्र संतप्त नगरसेवकांसमोर त्याचा युक्तिवाद टिकू शकला नाही.
