समृद्ध नगर न्यूज नेटवर्क : रबी हंगाम 2025-26 साठी हरभरा खरेदी प्रक्रियेला वेग देण्यासाठी शासनाने ऑनलाईन नोंदणीची मुदत वाढविण्याचा निर्णय घेतला आहे. यानुसार, हरभरा खरेदीसाठी शेतकऱ्यांनी करावयाची ऑनलाईन नोंदणी आता १५ एप्रिल २०२६ पर्यंत वाढविण्यात आली आहे.
पूर्वी ही मुदत ३१ मार्चपर्यंत निश्चित करण्यात आली होती. मात्र, सध्याचे बाजारभाव, शेतकऱ्यांची स्थिती तसेच नाफेडच्या विनंतीचा विचार करून शासनाने ही मुदतवाढ दिली आहे. त्यामुळे उशिरा काढणी झालेल्या किंवा अद्याप नोंदणी न केलेल्या शेतकऱ्यांना दिलासा मिळाला आहे.
शासनाने हरभऱ्यासाठी ५,८५० रुपये प्रति क्विंटल असा हमीभाव जाहीर केला असून, या दराने खरेदी केली जाणार आहे. बाजारातील दरात होणाऱ्या चढ-उतारांपासून संरक्षण मिळावे आणि शेतकऱ्यांना किमान आधारभूत किंमत मिळावी, हा यामागील उद्देश आहे.
बाजार समितीचे सभापती शरद कार्ले म्हणाले की, “हरभरा उत्पादक शेतकऱ्यांसाठी ही योजना अत्यंत लाभदायक आहे. ज्या शेतकऱ्यांनी अद्याप ऑनलाईन नोंदणी केलेली नाही, त्यांनी विलंब न करता नोंदणी पूर्ण करावी. नोंदणी केल्याशिवाय हमीभावाने खरेदीचा लाभ मिळणार नाही, याची शेतकऱ्यांनी नोंद घ्यावी.”तसेच, नोंदणी करताना आवश्यक कागदपत्रे अचूक सादर करावीत, जेणेकरून पुढील प्रक्रियेत कोणतीही अडचण येणार नाही, असेही त्यांनी सांगितले.
शासनाच्या या निर्णयामुळे तालुक्यातील मोठ्या संख्येने हरभरा उत्पादक शेतकऱ्यांना दिलासा मिळणार असून, हमीभाव योजनेचा लाभ अधिकाधिक शेतकऱ्यांपर्यंत पोहोचेल, अशी अपेक्षा व्यक्त होत आहे.
