पुण्यातील घायवळ टोळीचे दोन फरार आरोपी जेरबंद; 

पुण्यातील घायवळ टोळीचे दोन फरार आरोपी जेरबंद; 

जामखेड मधील गुन्ह्यातील एक आरोपी अटक , अहिल्यानगर एलसीबीची धडक कारवाई

समृद्ध नगर न्यूज नेटवर्क – 

पुण्यातील कुख्यात घायवळ टोळीशी संबंधित आणि मोक्का कायद्यांतर्गत दाखल गंभीर गुन्ह्यांमध्ये फरार असलेल्या दोन आरोपींना अहिल्यानगर स्थानिक गुन्हे शाखेने (एलसीबी) अटक केली आहे. रोहित उर्फ बबलू बाबासाहेब गोलेकर (वय २७, रा. खर्डा, ता. जामखेड) याला कोल्हापूर जिल्ह्यातून, तर ज्ञानेश्वर उर्फ माऊली दगडू तोंडे (वय ४०, रा. खेचरे, ता. मुळशी, जि. पुणे) याला अहिल्यानगर जिल्ह्यातून ताब्यात घेण्यात आले.

खर्डा येथील विजयसिंह कल्याणराव गोलेकर (वय ४५) यांनी दिलेल्या फिर्यादीनुसार, आरोपी रोहित गोलेकर याने व्हॉट्सअॅप कॉलद्वारे २० लाख रुपयांच्या खंडणीची मागणी केली होती. “पुण्यातील संघटित गुन्हेगारीच्या प्रकरणात तू मला वाचवले नाहीस. त्यामुळे माझे नुकसान झाले,” असे सांगत खंडणी न दिल्यास गोळ्या घालून ठार मारण्याची धमकी दिल्याचा आरोप आहे. याप्रकरणी खर्डा पोलिस ठाण्यात भारतीय न्याय संहितेच्या विविध कलमांन्वये गुन्हा दाखल करण्यात आला आहे.

पोलीस निरीक्षक संतोष मुटकुळे यांच्या नेतृत्वाखाली एलसीबीचे पथक आरोपींचा शोध घेत होते. तांत्रिक विश्लेषण आणि गुप्त माहितीच्या आधारे रोहित गोलेकर हा कोल्हापूर जिल्ह्यातील यड्राव फाटा परिसरात असल्याचे निष्पन्न झाले. त्यानुसार २१ जून रोजी सापळा रचून त्याला ताब्यात घेण्यात आले. चौकशीत त्याने गुन्ह्याची कबुली दिली असल्याचे पोलिसांनी सांगितले.

तपासादरम्यान रोहित गोलेकर हा पुणे शहरातील वारजे माळवाडी आणि कोथरूड पोलिस ठाण्यांत दाखल मोक्का कायद्यांतर्गत गुन्ह्यांमध्येही फरार असल्याचे उघड झाले.

दरम्यान, कोथरूड पोलिस ठाण्याच्या अभिलेखावरील फरार आरोपी ज्ञानेश्वर उर्फ माऊली तोंडे हा मिरजगाव परिसरातील सोलापूर-अहिल्यानगर महामार्गावरील उड्डाणपुलाखाली थांबलेला असल्याची माहिती मिळाली. त्यानुसार पोलिसांनी त्यालाही ताब्यात घेतले. त्याच्याविरुद्धही मोक्का आणि शस्त्र कायद्यासह गंभीर स्वरूपाचे गुन्हे दाखल असल्याचे समोर आले.

पोलीस नोंदीनुसार रोहित गोलेकर याच्याविरुद्ध सात, तर ज्ञानेश्वर तोंडे याच्याविरुद्ध सहा गुन्हे दाखल आहेत. दोघेही पुण्यातील कुख्यात घायवळ टोळीशी संबंधित असल्याचे तपासात स्पष्ट झाले आहे.

अटक करण्यात आलेला रोहित गोलेकर याला पुढील तपासासाठी खर्डा पोलिसांच्या ताब्यात देण्यात आले असून, ज्ञानेश्वर तोंडे याला पुणे शहर पोलिसांच्या स्वाधीन करण्यात आले आहे.

ही कारवाई पोलीस अधीक्षक मुम्मका सुदर्शन यांच्या मार्गदर्शनाखाली स्थानिक गुन्हे शाखेच्या पथकाने केली.