विधान परिषदेतील लक्षवेधीमुळे चौंडी सोसायटीचे खाते उघडले संस्था नोंदणीचा मार्ग मोकळा
मुख्य प्रवर्तक : वर्षाराणी पांडुरंग उबाळे
समृद्ध नगर न्यूज नेटवर्क –
नागपूर येथील हिवाळी अधिवेशनामध्ये विधान परिषदेचे आमदार प्रवीण जी दरेकर यांनी उपस्थित केलेल्या लक्षवेधीमुळे जामखेड तालुक्यातील पुण्यश्लोक विविध कार्यकारी सेवा सहकारी संस्थेच्या नोंदणीचा दीर्घकाळ प्रलंबित प्रश्न अखेर मार्गी लागला आहे.
जामखेड तालुक्याचे भूमिपुत्र राम शिंदे विधान परिषदेचे सभापती झाले. त्यानंतर पुण्यश्लोक विविध कार्यकारी सेवा सहकारी संस्था, चोंडी यांच्यावतीने लक्षवेधी दाखल करण्यात आली. या लक्षवेधीस आमदार प्रवीण दरेकर व श्रीकांत भारती यांनीही पाठिंबा देत लक्षवेधी मांडली. यावेळी विधान परिषदेचे सभापती राम शिंदे यांनी आदेश दिले. त्यावर उत्तर देताना सहकार मंत्री बाबासाहेब पाटील यांनी तात्काळ संस्थेचे खाते उघडण्याचे आदेश दिले. त्यामुळे एवढे दिवस प्रलंबित असलेला विषय मार्गी लागून कर्जवाटप करण्याचे आदेश देण्यात आले.
सदर संस्थेचा प्रस्ताव दिनांक 17/4/2017 रोजी सहाय्यक निबंधक सहकारी संस्था, जामखेड यांच्याकडे दाखल करण्यात आला होता. सहकार आयुक्त कार्यालय, पुणे यांनी दिनांक 19/3/2024 रोजी या संस्थेस मंजुरी दिली होती. त्यानंतर दिनांक 15/4/2024 रोजी सहाय्यक निबंधक सहकारी संस्था, जामखेड यांनी संस्थेचे खाते उघडण्याबाबत पत्र दिले.
मात्र अहिल्यानगर जिल्हा मध्यवर्ती सहकारी बँकेने दिनांक 10/6/2024 रोजी पत्र पाठवून दिनांक 24/2/2022 च्या ठराव क्रमांक 15 अन्वये खाते उघडता येणार नाही, असे कळविले.या बाबत विभागीय सहनिबंधक सहकारी संस्था, नाशिक यांच्याकडे तक्रार दाखल करण्यात आली असता, तक्रारदार मुख्य प्रवर्तक वर्षाराणी पांडुरंग उबाळे यांनी अर्जात नमूद केल्याप्रमाणे संस्था खाते उघडणे ही बाब बँक स्तरावर असून तात्काळ कार्यवाही करावी तसेच बँकेचे मंजूर उपविधी, महाराष्ट्र सहकारी संस्था अधिनियम 1960, नियम 1961 मधील तरतुदी व शासन परिपत्रकांचा भंग होणार नाही, याची दक्षता घेण्याच्या सूचना देण्यात आल्या. तरीदेखील संस्थेचे खाते उघडण्यात आले नाही.
अखेर मुख्य प्रवर्तक यांनी मा. उच्च न्यायालय, औरंगाबाद खंडपीठ येथे रिट पिटीशन क्रमांक 2959/2025 दाखल केली असून सद्यस्थितीत हे प्रकरण न्यायप्रविष्ट आहे.
गेल्या दोन वर्षांपासून अहिल्यानगर जिल्हा मध्यवर्ती सहकारी बँकेने संस्थेचे मुख्य प्रवर्तक व सभासद शेतकरी यांची पिळवणूक केली. या कालावधीत शेतकऱ्यांना कर्जापासून, पंजाबराव कृषी पंत पुरवठा धोरणातील शून्य टक्के व्याजदर योजनेपासून तसेच कर्जमाफीसारख्या महत्त्वाच्या योजनांपासून वंचित ठेवण्यात आले. तसेच विविध कार्यालये व न्यायालयांच्या फेऱ्या मारण्यास भाग पाडण्यात आले.
या निर्णयामुळे दिनांक 2/1/2026 रोजी संस्थेचे खाते उघडण्यात आले आहे. अहिल्यानगर जिल्हा सहकारी बँकेची मुदत फेब्रुवारी 2026 मध्ये संपत असून, येणाऱ्या निवडणुकीच्या तोंडावरच जामखेड तालुक्यात एका मतदानाची भर पडणार आहे. त्यामुळे विधान परिषदेचे सभापती राम शिंदे यांचे पारडे जड झाल्याचे चित्र दिसून येत आहे. अशा प्रकारे प्रलंबित असणाऱ्या संस्थांचा मार्ग मोकळा झाल्यामुळे जामखेड तालुक्यातील शेतकऱ्यांना त्याचा फायदा होताना दिसणार आहे.
