सभापती प्रा. राम शिंदे यांनी घेतले प्रभु श्री जगन्नाथांचे पावन दर्शन
समृद्ध नगर न्यूज नेटवर्क जगन्नाथ पुरी (ओडिशा)
हिंदू धर्मातील चार प्रमुख धामांपैकी एक असलेल्या ओडिशातील पवित्र जगन्नाथ पुरी येथे सभापती प्रा. राम शिंदे यांनी सहकुटुंब प्रभु श्री जगन्नाथांचे पावन दर्शन घेतले. या पावन तीर्थक्षेत्री दर्शनाचा योग लाभल्याने त्यांनी समाधान आणि कृतज्ञतेची भावना व्यक्त केली.
जगन्नाथ पुरी हे केवळ धार्मिक श्रद्धेचेच नव्हे, तर भारतीय संस्कृती, परंपरा आणि अध्यात्माचे प्रमुख केंद्र मानले जाते. येथे विराजमान असलेले प्रभु श्री जगन्नाथ, बलभद्र आणि सुभद्रा माता समता, भक्ती, मानवता आणि सामाजिक एकतेचा संदेश देतात. देशभरातून तसेच विदेशातूनही लाखो भाविक दरवर्षी येथे दर्शनासाठी येतात.
प्रा. राम शिंदे यांनी सहकुटुंब मंदिरात विधीवत दर्शन घेतले. दर्शनानंतर त्यांनी प्रभु श्री जगन्नाथांच्या चरणी महाराष्ट्राच्या जनतेच्या सुख-समृद्धीसाठी, राज्याच्या प्रगतीसाठी आणि सर्वसामान्य नागरिकांच्या कल्याणासाठी प्रार्थना केली. कुटुंबासोबत एकत्र प्रभुचरणी नतमस्तक होण्याचा हा क्षण अत्यंत भावनिक, समाधानकारक आणि आयुष्यभर स्मरणात राहणारा असल्याचे त्यांनी सांगितले.
या दर्शनामुळे मनाला अपार शांती मिळाली असून जीवनात सकारात्मक ऊर्जा आणि नवी प्रेरणा मिळाल्याची भावना त्यांनी व्यक्त केली. दैनंदिन धकाधकीच्या जीवनातून काही काळ दूर जाऊन अध्यात्मिक समाधान मिळणे आवश्यक असून अशा तीर्थदर्शनामुळे मन, शरीर आणि विचारांना नवचैतन्य मिळते, असे मतही त्यांनी व्यक्त केले.
जगन्नाथ पुरी मंदिर परिसरात दर्शनाच्या वेळी भक्तीमय वातावरण होते. “जय जगन्नाथ”च्या जयघोषाने संपूर्ण परिसर दुमदुमून गेला होता. भाविकांच्या श्रद्धा, भक्ती आणि उत्साहाचे दर्शन यावेळी पाहायला मिळाले.
