शाळा-कॉलेज सुटल्यानंतर मुलींना छेडछाडीचा त्रास; श्री शिवप्रतिष्ठान हिंदुस्थानचे जामखेड पोलिसांकडे निवेदन
समृद्ध नगर न्यूज नेटवर्क दि 2
जामखेड शहरात शाळा व महाविद्यालय सुटल्यानंतर मुलींना छेडछाडीचा व मानसिक त्रास सहन करावा लागत असल्याच्या घटना वाढत असून, याबाबत तात्काळ कठोर कारवाई करण्याची मागणी श्री शिवप्रतिष्ठान हिंदुस्थानचे अध्यक्ष पांडुराजे मधुकर भोसले यांनी जामखेड पोलीस स्टेशनकडे निवेदनाद्वारे केली आहे.
निवेदनात म्हटले आहे की, शहरातील शाळा-महाविद्यालय परिसर, कॉलेज रोड, चौक, तहसील कार्यालय परिसर तसेच बसस्थानक परिसरात काही टवाळखोर युवक मोटारसायकल वेगात चालवणे, मुलींना कट मारणे, हार्न वाजवणे, हातवारे करणे, अश्लील टोमणे मारणे अशा प्रकारे खुलेआम छेडछाड करत आहेत. अलीकडेच जामखेड बसस्थानक परिसरात मुलींना छेडछाडीचा प्रकार घडल्याने विद्यार्थिनींमध्ये भीतीचे वातावरण निर्माण झाले आहे.
सकाळी सुमारे सात वाजल्यापासून महाविद्यालय सुरू होत असल्याने त्या वेळेस नागरिकांची वर्दळ कमी असते. याचाच गैरफायदा काही समाजकंटक युवक घेत असल्याचेही निवेदनात नमूद करण्यात आले आहे. या प्रकारांमुळे पालकांमध्ये असुरक्षिततेची भावना वाढली असून, भविष्यात बाहेरगावाहून शिक्षणासाठी येणाऱ्या मुलींच्या शिक्षणावर विपरीत परिणाम होण्याची शक्यता व्यक्त करण्यात आली आहे.
या पार्श्वभूमीवर शाळा व महाविद्यालय सुटण्याच्या वेळेस विशेष पोलीस पथक नियुक्त करावे, बसस्थानक व प्रमुख ठिकाणी गस्त वाढवावी, तसेच अशा टवाळखोर युवकांवर तात्काळ व कठोर कारवाई करावी, अशी मागणी करण्यात आली आहे. गरज भासल्यास विशेष मोहिम राबविण्याचीही मागणी निवेदनात करण्यात आली आहे.
योग्य ती व तात्काळ कारवाई न झाल्यास भविष्यात घडणाऱ्या गंभीर घटनेस पोलीस प्रशासन जबाबदार राहील, अशी स्पष्ट भूमिका निवेदनात मांडण्यात आली आहे.
